کمتر از یک ماه دیگر به آغاز مراسم حج زمان باقی مانده است، در افغانستان نخستین گروه زائران بیت‌الله شریف روز یکشنبه، کابل را به مقصد عربستان سعودی ترک کردند.
عبدالسلام حنفی، معاون نخست‌وزیر که در میدان هوایی کابل حضور یافته می‌گوید، قرار است بیش از ۱۳ هزار نفر از افغانستان در مراسم حج امسال شرکت کنند.
او گفت، برای مهیا کردن شرایط انتقال زائران به بیت‌الله شریف، تلاش‌های فراوانی صورت گرفته است.
از سویی هم، مولوی عبدالکبیر، معاون سیاسی نخست‌وزیر به زائران بیت‌الله شریف توصیه‌های را ایراد نمود، او خطاب به زائران حج گفت، شما با حجاج از سراسر جهان روبرو می‌شوید و باید به آنها پیام برادری را برسانید.
او همچنین از کسانی که در تحولات پسین، افغانستان را ترک کرده‌اند خواست دوباره به کشورشان برگردند.
با اینهمه، وزارت حج و اوقاف اعلام کرده که روند انتقال حجاج از زون مرکز آغاز شده و این روند در روزهای آینده از تمامی زون‌ها ادامه پیدا می‌کند.