قرار است که نشست پگواش با محوریت صلح در افغانستان هفتۀ آینده با حضور نماینده‌گان حکومت افغانستان و پاکستان در اسلام‌آباد برگزار گردد.
به گزارش “شبکه تلویزیونی تمدن “اما مقام‌های شورای عالی صلح کشور می‌گویند، تا زمانی که طالبان حاضر به گفت‌وگو با حکومت افغانستان نشوند، برگزاری چنین نشست‌ها سودی برای آمدن صلح در افغانستان نخواهد داشت. او می‌گوید طالبان مایل به صلح در افغانستان نیستند و تا زمانی که فشارها بالای این گروه افزایش نیابد حتا حاضر به گفت‌وگو نمی‌شوند.
قرار است که در نشست پگواش، فاروق وردک، انوارالحق احدى، ضیاالحق امرخیل، روح‌الله وکیل، خلیل‌الله صافى و برخی از چهره‌های دیگر به نماینده‌گی از افغانستان و رستم‌شاه مهمند سفیر پیشین پاکستان، اسد‌درانى رییس پیشین آی.اس.آی و شماری از سیاست‌گران پاکستانی اشتراک خواهند کرد.
پیش از این، پگواش نشست‌هایی را در قطر، امارات متحده، فرانسه و شماری از کشورهاى دیگر به هدف صلح در افغانستان برگزار کرده است. آگاهان می‌گویند که برگزاری این نشست‌ها تاکنون سودی برای صلح افغانستان در پی نداشته است.