د تمدن ټلويزيوني چينل

حامد کرزی وایی دطالبانو تر شا بهرنیان ولاړ دی او له دوی څخه په خپله ګټه کار اخلی

حامد کرزی وایی دطالبانو تر شا بهرنیان ولاړ دی او له دوی څخه په خپله ګټه کار اخلی

ولسمشر حامد کرزی وایی چې د وسلوالو طالبانو تر شا بهرنی قوتونه ولاړ دی او دوی استعمالوی.

ولسمشر دغه څرګندونې  د افغانستان دعالمانو سراسری شورا سره  د لیدنې پر مهال کړې دی.

هغه زیاته کړې : (( طالبان هسې یو نوم دی او افراد دی چې استعمالیږی له همدې امله هڅه کوو چې د سولې پروسه په پوره دقت او احتیاط سره پر مخ بوځو ترڅو د سولې پروسه په بشپړه توګه افغانی و اوسی.))

حامدکرزی په دغه غونډه کې افغان مخاطب کړل او ویې ویل : (( له تاسو موږ دلته ډیر احتیاج یو خو غیرت، مسلمانی، شهامت او استقلالیت مو نه دی بایللی د خپلې خاورې څخه د دفاع په لاره کې ولاړیو.))

هغه له طالبانو وغوښتل چې د پردیو له سلطې څخه ځان خلاص کړی، خپلې خاورې ته دې راشی. هلته به بیا د دې خاورې قوت دوه برابره شی.

ولسمشر کرزی د ښځو پرخلاف د تاوتریخوالی د مخنیوی په اړه  په اړه د عالمانو شورا د مصوبې په تائید  سره وویل چې د اسلام مقدس دین د ښځو پرخلاف تاوتریخوالی په څرګنده توګه منع کړی دی چې هر مسلمان باید د اسلام د مقدس دین لارښوونې په خپل ځان عملی کړی.

دعالمانو شورا ته د ولسمشر حامد کرزی تر خبرو مخکې د عالمانو د سراسری شورا غړو په دې کتنه کې وویل چې د اسلام مقدس دین په کورنی او اجتماعی ژوندانه کې هر ډول افراط او تفریط او تاوتریخوالی غندلی او د اعتدال خوښونکی قانون په توګه یې خلک د هرډول لمسوونکی عمل، حسد او غضب پر وړاندې صبر او حوصلې ته رابللی دی.

دارګ په خبرپاڼه کې راغلی دی چې د عالمانو د سراسری شورا په مصوبه کې چې ولسمشر سره په کتنه کې ولوستل شوه،پکې راغلی چې د قرآن کریم د سوره النساء په ۱۹ آیت کې راغلی دی چې له ښځو سره ښه او نیک سلوک وکړی. همدا راز حضرت محمد (ص) فرمایلی دی چې: ” له تاسو څخه غوره کسان هغه دی چې د خپلو ښځو لپاره  ښه و اوسی او زه له تاسو ټولو څخه له خپلې کورنۍ سره ښه چلند کوم.”

همدا راز په دغه مصوبه کې ویل شوی دی چې د اسلام ستر پیغمبر حضرت محمد (ص) د خپل مبارک عمر په اوږدوکې له هیڅ انسان او حتی حیوان سره هم تاوتریخوالی نه دی کړی.

د سرچینې د معلوماتو له مخې، د عالمانو سراسری شورا هغه ترهګریز برید چې د سې شنبې په ورځ  د سترې محکمې پر وړاندې ترسره شو، په کلکه وغانده او څرګنده یې کړه  چې د بې ګناه  ښځو، نارینه وو او ماشومانو وژل چې په هرنامه وی د اسلام د مقدس دین له نظره حرام او ناروا دی.

د عالمانو سراسری شورا په مصوبه کې ویل شوی چې دغه شورا د اسلامی احکامو په اساس د سولې پر ښیګڼو باور لری او د افغانستان په جګړه کې له ټولو ښکیلو اړخونو څخه غواړی چې د اسلام د مقدس دین د لارښوونو له مخې دې خپلو اختلافاتو ته د روغې جوړې او بین الافغانی ډیالوګ له لارې د پای ټکی کیږدی چې خدای مه کړه په نا اګاهانه ډول د پردیو د سیاسی او نظامی اهدافو ښکار نه شی.

دغه شورا د افغانستان له دولت او په ځانګړی ډول د سولې له عالی شورا څخه غواړی چې د بهرنیو لوبغاړو دسیسو ته متوجه و اوسی او هیڅکله دې هم داسې شرایط ونه منی چې سیاسی نظام، ځمکنۍ بشپړتیا، ملی حاکمیت او ملی یووالی ته زیان و رسوی.

د عالمانو سراسری شورا همدا راز په خپله مصوبه کې ویلی دی چې له یوې مودې ر اهیسې پوهنتونونه او درسی ټولګی د سیاسی اهدافو د ترسره کېدلو لپاره د مشاجرو اوکشمکشونو په میدانونو بدل شوی دی چې د پوهنتونونو د فضا سیاسی کېدل زموږ د هېواد او ملت په خیر نه ده.

شورا ټینګار کوی چې استادان او محصلین دې خپلې مظاهرې ودروی او خپلو زده کړو ته دې دوام ورکړی.

د عالمانو شورا د افغانستان له دولت څخه هم غواړی چې د استادانو او محصلینو معقولو او قانونی غوښتنو ته دې ځواب و وایی.

حامدکرزی د افغانستان د عالمانو د سراسری شورا مصوبه د افغانستان د ملی ګټو او د دینی ارزښتونو د ساتنې په لاره کې مهمه وبلله.